WAANDISHI WA HABARI VIJANA WAPATIWA MAFUNZO YA KUTAMBUA TAARIFA SAHIHI KUELEKEA KIPINDI CHA UCHAGUZI.

NA MARYAM NASSOR

WAANDISHI wa Habari Vijana wametakiwa kuisoma elimu ya Artificial Intellegence ‘AKILI UNDE’ na kuielewa kwani wao ndio kinga moja wapo ya kuhakikisha jamii haiyathiriki na Habari za Uongo( Mis information).

Akifungua Mafunzo ya siku moja kwa waandishi wa Habari Vijana kutoka klabu za waandishi wa Habari wa Unguja na Pemba, Mkurugenzi kutoka Muungano wa Klabu za Waandishi wa Habari Tanzania (UTPC) Keneth Simbaya katika Ukumbi wa Kituo cha Huduma za Sheria Kijangwani Mjini Unguja.

Amesema, lengo la mafunzo hayo ni kuwaandaa waandishi wa Habari vijana kutekeleza majukumu ya kihabari kwa weledi na umahiri katika kipindi hichi cha uchaguzi ambacho kumekuwa kukishamiri Habari za uongo na Upotoshaji mitandaoni.

“ Kama munavyofahamu katika dunia ya sasa ambayo imetawaliwa na matumizi mabaya na mazuri ya ‘AKILI UNDE’ hivyo lengo la mafunzo haya kwenu ni kuona kwa namna gani munatambua taarifa sahihi na zisizosahihi kupitia njia mbali mbali” amesema .

Mkurugenzi huyo, amewataka waandishi wa Habari kujifunza zaidi matumizi sahihi ya ‘AKILI UNDE’ ili kuhakikisha taarifa zinazosambazwa mitandaoni kuweza kuelewa usahihi wake.

Akiwasilisha mada juu ya namna ya kuzitambua Habari za Uongo na Ukweli Mkufunzi wa maswala ya kimtandao Ephraim Muchemi, amewataka waandishi wa Habari kutumia program mbali mbali kama vile Tine eye na Google ili kuweza kutambua taarifa hizo.

Amesema , lazima waandishi wa Habari wasome njia tofauti tofauti za kuthibitisha Habari za uongo na ukweli kabla ya kuzisambaza ili kuepusha taarifa za upoteshaji zisisambae.

“ Kuna njia nyingi zinaweza kusaidia katika kuzitambua Habari za Uongo na Upotoshaji ikiwa ni picha, video au hata maelezo unaweza kuingiza kwenye program ya Google Lens, Tin eye na nyenginezo kupata kujua usahihi wa taarifa hizo” amesema Mkufunzi huyo.

Kwa upande wake, Afisa Programu kutoka UTPC Andrew Marawiti, amewataka waandishi wa Habari hao kuendelea kuyafanyia kazi mafuzo hayo kwa vitendo ili yaweze kuwasaidia katika shughuli zao za kiuandishi.

“ Kuwa kwenu hapa leo haikuwa Bahati mbaya tambueni kuwa mulikuwa wengi sana kwenye maombi ila nyinyi ndio tumeona munafaa zaidi kutokana na maelezo yenu mulivyojielezea , hivyo basi tunaomba sana mukaendelee kuyatumia mafunzo haya kwa vitendo ili yaweze kuwasaidia zaidi “ amesisitiza .

Nao, Baadhi ya waandishi wa Habari waliyopatiwa mafunzo hayo Suleiman Tambuligeni kutoka Zanzibar Press Club (ZPC) na Muyaba Kombo kutoka Pemba Press Club (PPC) wamesema mafunzo hayo yamekuja muda muafaka na yatawasaidia katika kipindi hicho cha Uchaguzi Mkuu .

Akifunga Mafuzo hayo ya siku moja, Mwenyekiti wa Klabu ya Waandishi wa Habari Zanzibar ( ZPC) Abdalla Mfaume amesema katika zama hizi za Maendeleo ya Sayansi na Teknolojia kumekuwa na Habari nyingi za Uongo na Upotoshaji. Hivyo amewaomba waandishi hao kuyafanyia kazi mafunzo hayo hasa kipindi hichi cha uchaguzi.

Mafunzo hayo ya siku moja, yamewashirikisha Waandishi wa Habari Vijana kutoka katika klabu za waandishi wa Habari wa Unguja na Pemba, ambayo yameandaliwa na Muungano wa Klabu za Waandishi wa Habari Tanzania ( UTPC) kwa ufadhili wa Nether land (NL).