Wanawake si wafuasi tu wa siasa, bali ni wabeba mabadiliko ya jamii

Na Maryam Nassor

Katika historia ya kisiasa ya Zanzibar, nafasi ya wanawake mara nyingi imekuwa haionekani ipasavyo, Lakini kila kizazi kimekuwa na mashujaa wake waliothubutu kuvunja ukuta wa kimya.

Miongoni mwao ni Nadhra Ali Haji, mgombea ubunge wa Jimbo la Malindi kupitia Chama cha Alliance for Democratic Change (ADC). Ujasiri wake, uzoefu wa kisiasa na dhamira ya kuimarisha ushiriki wa wanawake katika maendeleo ni kielelezo cha kiongozi wa kizazi kipya.

Safari yake ya kisiasa, uzoefu wa uongozi na mtazamo wa kijinsia ni kielelezo cha namna wanawake wanavyoweza kuchangia maendeleo ya jamii na taifa kwa ujumla.

MAISHA YAKE BINAFSI

Nadhra Ali Haji alizaliwa mwaka 1970 Mtaa wa Vikokotoni Mjini , Unguja Zanzibar. Akiwa mtoto wa familia yenye maadili ya heshima na mshikamano, alikulia katika mazingira yaliyochanganya historia, utamaduni na harakati za kijamii, hali iliyompa msingi wa mapema wa kujiamini na kujitolea.

Elimu yake ameanzia katika Shule ya Msingi Tumekuja kisha akaendelea na masomo ya sekondari katika Shule ya Ben bembela.

Kwa wakati huo baada ya kumaliza elimu yake ya Sekondary alikwenda kujiunga na kikosi cha Idara ya anga ambapo elimu hiyo ilimjengea msingi imara wa kuunganisha taaluma na vitendo katika uongozi.

SAFARI YAKE YA KISIASA

Nadhra Ali Haji alijiunga rasmi na chama cha CUF mwaka 1993, kipindi ambacho chama hicho kilikuwa kinapanua wigo wake katika harakati za kidemokrasia nchini.

Safari yake ya uongozi imenza akiwa mwanachama mdogo kabisa katika chama wananchi CUF , ambapo alikuwa ni katibu katika tawi la Shangani na Mji mkongwe Unguja.

Amesema na baadae mwaka 1995 akiwa Pemba alihamasika kugombea nafasi ya viti maalum kura zilifungana yeye na mwenzake , lakini kutokana na umri mdogo aliokuwa nayo alikuwa hajui baada ya kushinda atakuwa nani hivyo nafasi hiyo akamuachia menziwe.

“ Najivunia sana katika siasa mimi niliazia tawi ambapo nilikuwa muhamasishaji mzuri wakati mwengine nilifuatwa na watu wa chama cha Mapinduzi nijiunge na chama hicho” amesema Bi Nadhra.

Akiwa mwanachama wa mwanzo kabisa, alikuwa katibu wa tawi la mji Mkongwe na alishiriki moja kwa moja katika mikutano ya hadhara, warsha za mafunzo, na mijadala ya kisiasa iliyojikita katika kutafuta misingi imara ya chama.

Kutokana na mabadiliko ya mfumo na viongozi kwa chama hicho mwaka 2024 Nadhra alijiunga na chama cha ADC na alijipatia umaarufu mkubwa kama mwanasiasa mwenye msimamo thabiti, aliyejenga hoja zenye mashiko na mwenye mtazamo mpana kuhusu nafasi ya mwanamke katika siasa.

UZOEFU WAKE KATIKA KUSHIRIKI UCHAGUZI.

Kabla ya kugombea Ubunge wa Jimbo la Malindi mwaka huu, Nadhra aliwahi kushiriki uchaguzi wa mwaka 2010 akiwa katika chama cha wananchi CUF, ambapo alisimama kugombea nafasi ya viti maalum katika chama hicho ingawa hakushinda.

Aidha, mwaka 2015 alijaribu tena kugombea nafasi ya ubunge kupitia chama hicho, lakini hakuweza kufanikisha ushindi kutokana na changamoto za kisiasa za wakati huo.

Hata hivyo, kushiriki kwake katika chaguzi hizi kumemjengea uzoefu wa kisiasa, uimara wa kisaikolojia, na uelewa wa karibu wa changamoto zinazowakabili wapiga kura wake.

MTAZAMO WA KIJINSIA .

Nadhra Ali Haji ni miongoni mwa viongozi wachache wanaoamini kwamba maendeleo ya kweli ya Zanzibar hayawezi kufanikiwa bila ushiriki wa wanawake.

Amesema kuwa ,wanawake hawapaswi kuachwa nyuma katika siasa , elimu, uchumi na afya ambapo anapigania uwezeshaji wa wanawake kiuchumi kupitia vikundi vya mikopo midogo midogo na mafunzo ya ujasiriamali.

Amesema kuwa, Elimu ya mtoto wa kike ni muhimu akiamini kwamba elimu ni daraja la kumtoa mwanamke kwenye umasikini na utegemezi.

Aidha amesema kuwa, Ushiriki wa wanawake katika uamuzi wa kisiasa, ni muhimu huku akihimiza vyama vya siasa na serikali kutenga nafasi zaidi kwa wanawake kwenye ngazi za uongozi.

Kupitia nafasi yake ndani ya ADC ya Mwenyekiti wa wanawake katika chama hicho amekuwa mstari wa mbele kuhamasisha wanachama wanawake kushiriki kikamilifu kwenye mikutano, warsha na kampeni.

MALENGO YAKE YA BAADAE.

Iwapo atapata ridhaa ya wananchi, Nadhra ameahidi kusukuma ajenda zifuatazo , Kwanza Kuimarisha huduma za elimu na afya kwa wanawake na Watoto katika jimbo hilo.

Ameseme kuwa atawawezesha vijana na wanawake kwa miradi ya kiuchumi na maendeleo kwa kuanzisha viwanda vidogo vidogo katika jimbo hilo.

Aidha kutoa huduma ya mikopo nafuu kwa wanawake na wanaume wajasiriamali ili kujikwamua kiuchumi.

“ Nitahakikisha nasimamia uwakilishi wa wanawake na vijana katika nafasi za maamuzi jimboni ‘’ amesema .

WATU WANAOMFAHAMU WANAMZUNGUMZIAJE.

Mtumwa Feisal mgombea ubunge jimbo la Chumbuni kwa tiketi ya chama hicho, amesema Nadhra Ali Haji si tu mgombea wa ubunge ni alama ya matumaini mapya kwa Malindi.

’’ Kiukweli Nadhra ni mgombea shupavu mwenye maono na mapenzi ya kweli kwa wananchi na mpenda maendeleo ni alama ya matumaini kwa wana Malindi” amesema.

Amesema kuwa, tangu alipojiunga na ADC , safari yake imekuwa ni ushahidi na ujasiri wa mwanamke anayeamini kwamba siasa ni chombo cha maendeleo ya kijamii.

Nae, Abdallah Ali mwanachama wa chama hicho amesema Mgombea huyu anabeba matumaini ya wanawake na wanaume wa Malindi, akiwakilisha kizazi kipya cha wanasiasa wenye nia ya dhati ya kulijenga taifa kwa mshikamano na mshikikano wa kijinsia

Amesema kuwa, Kwa wananchi wa Malindi Nadhra anawakilisha siasa zenye maono siasa zinazojali jinsia na siasa zinazolenga maendeleo kwa wote.

“ Ushindi wake unaweza kuwa si ushindi binafsi, bali ni ushindi wa wanawake wote wa Zanzibar wanaopigania nafasi ya kusikika na kushirikishwa “ amesema .

Bottom of Form

Mwisho