SHERIA MPYA YA HABARI ZANZIBAR BADO KITENDAWILI.

 

NA MARYAM NASSOR,

WAANDISHI wa habari nchini wametakiwa kuongeza kasi ya  ufuatiliaji  wa sheria mpya ya habari kutokana na kuwa bado  ni kitendawili.

Akizungumza katika kikao cha  majadiliano ya sheria  kandamizi za  habari , katika ofisi kuu ya TAMWA ZNZ , huko Tunguu Unguja mjumbe wa bodi  hiyo Bi Hawra Shamte alisema bado kuna utata mkubwa  kuhusu sheria hiyo.

  Alisema,  kiukweli hiyo sheria  haijulikani imefikia hatua gani na iko wapi kwasasa, kutokana na kuwa kila mmoja anasema la kwake.

“ Tulitegemea siku ya uhuru wa habari tungeambiwa kuhusu  sheria hiyo  kuwa, imefikia wapi au lini itazinduliwa  lakini bado hatujui hatua iliyofikiwa”, Alisema.

Aidha, aliwataka wandishi wa habari kuendelea kufanya uchechemuzi juu ya upatikanaji wa sheria  mpya ya habari nchini.

 Mratibu wa baraza la habari Tanzania kwa upande wa Zanzibar,Bishifaa said Hassan alisema kuwa, waandishi waendelee kupaza sauti zao  kudai sheria mpya ya habari.

 Alisema kuwa,kutokana na kuwepo haja ya sheria rafiki kwa wandishi, hali hiyo imezidi kwasasa  kutokana na kuwa wandishi wahabari wanakosa uhuru wa kujieleza, hata katika siku ya uhuru wa habari.

 “ Hii hali ni mbaya kwasasa wandishi wa habari wanakosa uhuru wa kujieleza hata katika siku ya uhuru wa habari, wakajieleze wapi’’ alisema.

Nae,  Salum Said  ambae ni mwandishi  wa  habari mkongwe , alisema kuwa sheria zilizopo haziumizi tu, uhuru wa habari bali  zinawaumiza wananchi kwa ujumla.

 Alisema kuwa,  uhuru wa habari hauwezi kupatikana  endapo kutakuwa na sheria kandamizi ambazo  zinawakandamiza wandishi na wananchi.

 Aidha, aliwasihi wandishi wa habari nchini  kuendelea  kufanya ufuatiliaji ili sheria mpya ya habari ipatikane kutokana na kuwa ni  zaidi ya miaka 20 sasa wamekuwa wakiifuatilia sheria hiyo.

 Wakichangia katika kikao hicho,   baadhi ya waandishi wa habari walisema kuwa. Wamekuwa  wakikutana na vikwazo vingi katika kufanikisha  majukumu yao, hali inayowasababishia  kukosa uhuru  na kuwajibika ipasavyo.

 Kikao hicho cha siku moja, kimeandaliwa na TAMWA ZNZ kwa wandishi na wadau wa habari kwa lengo la kuendelea kufanya ufuatiliaji wa sheria mpya  za habari nchini.

                            MWISHO