JACKIE NINSIME AHUKUMIWA KIFUNGO CHA MAISHA JELA

NA MARYAM NASSOR

MAHAKAMA Kuu Zanzibar, imemuhukumu mshitakiwa Jackie Ninsime mwenye umri wa miaka (47) raia wa Uganda kutumikia kifungo cha maisha chuo cha mafunzo kwa kosa la kusafirisha dawa za kulevya.

Akisoma hukumu hiyo,Jaji Mohamed Ali Mohamed amesema mshtakiwa huyo ametiwa hatiani baada ya mahkama kujiridhisha na Ushahidi uliotolewa na upande wa mashtaka .

Amesema kuwa, upande wa mashtaka ulifanikiwa kuthibitisha kosa hilo bila ya chembe ya shaka, kwa kuleta jumla ya mashahidi sita kutoa ushahidi wao mbele ya Mahkama hiyo.

“ Mahkama hii imejiridhisha na Ushahidi uliyotolewa na upande wa mashtaka na imemtia hatiani mshtakiwa huyo, kutumikia kifungo cha maisha chuo cha mafunzo ili iwe fundisho kwake na wengine wenye tabia kama hiyo .” amesema jaji Mohamed.

Awali Mahakamani hapo, Mwendesha Mashtaka wa Serikali kutoka Afisi ya Mkurugenzi wa Mashtaka Zanzibar ( DPP) Ali Amour ,alidai kuwa mshitakiwa huyo alikamatwa Uwanja wa ndege wa kimataifa wa Abeid Amani Karume akitokea Uganda kuja Zanzibar kwa ndege ya Ethiopian Airline.

Aidha alidai kuwa, mshtakiwa huyo uwanjani hapo alishikwa na pipi 12 za madawa ya kulevya aina ya Cocaine, na pipi nyengine 26 zikiwa kazimeza na kuzitowa kwa njia ya haja kubwa akiwa katika hospital kuu ya Mnazi mmoja Unguja.

Awali ilidaiwa mahkamani hapo, mshtakiwa huyo alishtakiwa kwa makosa ya kusafirisha na kumiliki madawa ya kulevya aina ya Cocaine kinyume na kifungu namba. 21 (1) (a) (d) cha sheria namba. 8 ya mwaka 2021 cha sheria za Zanzibar.

Ambapo , mnamo tarehe 22/10/2023 majira ya saa nane na dakika tano mchana huko katika uwanja wa ndege wa kimataifa wa Abeid Amani Karume alipatikana akisafirisha madawa ya kulevya aina ya Cocaine pipi 38 zenye uzito wa gramu 454.0258 jambo ambalo ni kosa kisheria.

Kesi hiyo ,ni ya tatu kwa mwaka huu kupata hukumu kubwa kama hiyo ya kifungo cha maisha jela kwa kesi za madawa za kulevya ya kwanza ilikuwa ni ya Nassor Suleiman Khalfani na wenzake wawili na ya pili ya Ali Mohamed Ali maarufu Ali Macho na Fahad Ali Khamis ambao walikamatwa na madawa ya kulevya na kuhukumiwa kifungo cha maisha jela .