WAANDISHI WA HABARI ENDELEENI KUPAZA SAUTI ZA WANAWAKE -TAMWA ZNZ

NA MARYAM NASSOR

WAANDISHI wa Habari wametakiwa kuendelea kuandika Habari za wanawake ambao bado sauti zao hazijasikika katika kukabiliana na mabadiliko ya tabianchi .

Akizungumza na wandishi wa Habari , Meneja miradi kutoka Chama cha wandishi wa Habari wanawake Tanzania Zanzibar( TAMWA ZNZ) Nairat Abdulla huko katika Afisi za chama hicho Tunguu.

Amesema, wanawake wengi wanafanya kazi kubwa katika kukabiliana na mabadiliko ya tabianchi kwa kulima na kuhifadhi mikoko lakini jitihada zao hizo bado hazijaonekana katika jamii.

Amesema kuwa, utafiti uliyofanya na chama hicho umebaini kuwa bado uwepo na ushiriki wao katika shughuli hizo haujapewa kipaumbele ipasavyo, kupitia vyombo vya habari .

“ Utafiti tuliyofanya TAMWA, ZNZ umegundua bado sauti za wanawake hazijasikia ipasavyo kupitia vyombo vya Habari katika kukabiliana na mabadiliko ya tabianchi , hivyo wandishi wanapaswa kuongeza nguvu katika eneo hilo” amesema Nairat.

Nae, Meneja Mashiriano ya Kimataifa kutoka Jumuiya ya Kutunza Mazingira ya Kimataifa ( CFI ) Lilian Simule amesema, mradi wa Zanz Adapt wanahamasisha wakulima viongozi kutumia vyombo vya Habari kutangaza kazi zao.

Amesema kuwa, mradi huo unawawezesha wakulima kulima kilimo mseto na kilimo biashara, hivyo ni vyema kujitangaza ili jamii ijuwe wanafanya nini katika kutunza mazingira na kukabiliana na mabadiliko ya tabianchi.

Aidha kwa upande wake, Meneja wa Mawasiliano kutoka TAMWA,ZNZ Sophia Ngalapi alisema waliona kuna umuhimu mkubwa wa kurejea mafunzo hayo kwa wandishi wa Habari ili kuwaweka sawa.

“ Tumeona ipo haja kubwa kuyarejea haya mafunzo ili kusikiliza maoni yenu na kukumbushana maeneo ya mradi huu ili musiende kinyume” alisema Ngalapi.

Nae, Afisa Kilimo Msitu Rhoda Daniel Kadaso alisema mradi huo umeanzisha vitalu vya miche ya misitu na mboga mboga kwa lengo la kuwasaidia wakulima wa mradi huo, kupata miche bora na kwa wakati ili kuongeza kipato chao.

“ tuliwatowa wakulima wa mazao kutoka hapa Zanzibar Kwenda Tanzania bara ili kupata uzoefu na kujifunza kilimo zaidi na kuona jinsi gani wenzao wanalima na kupata faida”

Nae, Afisa Mawasiliano kutoka Jumuiya ya kuhifadhi Misitu Pemba ( CFP) Munira Kaoneka amesema katika mradi huo wanataka wandishi wa habari kuandika zaidi katika kuwahamasisha wanawake kuona umuhimu wa kumiliki ardhi .

Amesema kuwa, wanawake wengi hawamiliki ardhi hasa huko vijijini ,na wanaomiliki hawana hati za umiliki wa ardhi kisheria .

“ Tunataka wandishi wahamasishe wanawake waone umuhimu wa kumiliki ardhi lakini pia wawe na hati za umiliki kisheria ili ” amesema Munira.

Mafunzo hayo, ya siku tatu yameandaliwa na Chama cha Waandishi wa Habari Tanzania Zanzibar( TAMWA ZNZ,) Jumuiya ya Kuhifadhi Misitu Pemba ( CFP) na Jumuiya ya Kuhifadhi Mazingira Kimataifa ( CFI) na kuwashirikisha wandishi 20 waliyokuwemo katika mradi huo.